Prezidentliyə namizəd İlham Əliyevin səs verdiyi Səbayel rayon 29 saylı seçki dairəsinin (DSK) 6 saylı məntəqəsində “Azadlıq” radiosunun əməkdaşı da daxil olmaqla bir sıra beynəlxalq KİV təmsilçilərinə bu prosesi müşahidə etməyə imkan verilməyib. Bu barədə adıçəkilən radio xəbər yayıb.
Dünən xaricdə yaşayan həmvətənlərimiz də prezident seçkilərində iştirak etdilər. Əgər buna iştirak demək olarsa... Söhbət ondan gedir ki, MSK iki milyona yaxın Azərbaycan vətəndaşının çalışdığı Rusiya Federasiyası da daxil olmaqla, 32 ölkədəki səfirliklərimizə cəmi 10 min bülleten göndərib.
Hakimiyyətin “Siyasi partiyalar haqqında” qanuna əlavə və dəyişiklikləri prezident seçkisindən sonraya saxladığı barədə hələ bir il öncə yazdıqlarımız tam təsdiqini tapdı. Beynəlxalq təşkilatlar və siyasi partiyalar dəfələrlə məsələ qaldırsalar da iqtidar vaxtı uzada-uzada məsələni 2008-ci ilin prezident seçkisinədək həll edilməmiş saxladı. Hakimiyyətin sözügedən qanunu seçkidən sonra qəbul edəcəyi barədə bir qədər öncə məlumat vermişdik.
“Lider”in əməkdaşı, “Sədadan sonra” verilişinin aparıcısı Etibar Hüseynov kobud səhvə yol verib. Srağagün müəllifi olduğu verilişdə seçkilərlə bağlı danışan E.Hüseynov öz şərhini belə qurtarıb: “Sizi it hürən tərəfə yox, işıq gələn tərəfə səs verməyə çağırıram”.
Qobustan həbsxanasındakı ömürlük məhbus Əli Quliyevin “Turan” agentliyinə elektron məktubu daxil olub. Məhbus öz müraciətini ədliyyə naziri Fikrət Məmmədova, İşgəncələr Əleyhinə Avropa Komitəsinin sədri Peti Nesterovoya, Azərbaycan İnsan Hüquqlarını Müdafiə Mərkəzinin rəhbəri Eldar Zeynalova və mətbuata ünvanlayıb.
Hakimiyyətin canfəşanlığına və apardığı təbliğata baxmayaraq, dünənki seçkilər çox sönük keçdi. Seçki məntəqələrində yarım saatdan bir iki cüt, bir tək seçici görünürdü. Gün ərzində bir neçə dəfə redaksiyanın yaxınlığında yerləşən bir neçə seçki məntəqəsinə baş çəkdik və hər dəfə də məntəqənin qarşısında cəmi bir neçə nəfərin olduğunu müşahidə etdik. Saat 13: 50. Binəqədi rayon 8 saylı DSK-nın 30 saylı məntəqəsinin qarşısı. Yarım saatdır məntəqənin qarşısındayıq, amma kiminsə səsverməyə gəldiyi müşahidə olunmur. Məntəqənin qarşısında ayrı-ayrı təşkilatların keçirdikləri “exit-poll” qutularına da yaxınlaşan yoxdu.
“MDB ölkələri ilə Gürcüstan arasında sərhəd və viza rejimində əlbəttə ki, dəyişikliklər olacaq”. Bu açıqlamanı APA-ya Müstəqil Dövlətlər Birliyi (MDB) İcraiyyə Komitəsinin sədri Sergey Lebedev verib. O, Gürcüstan MDB-dən çıxandan sonra qeyd olunan sahədə problemlərin çox güman ki, ikitərəfli əsasda həll olunacağını bildirib.
ABŞ-da yaxınlaşmaqda olan prezident seçkiləri ərəfəsində demokrat namizəd Barak Obama rəqibi Con Makkeyni təkcə ölkə daxilində deyil, xarici ölkələrdə də böyük fərqlə qabaqlayır. Son rəy sorğularına görə, respublikaçı namizədə təkcə Gürcüstanda və Kubada rəğbət böyükdür, Barak Obama isə dünyanın qalan ölkələrində rəğbətlə qarşılanır.
Zaqatalada separatçılıqda və milli ayrı-seçkilik salmaqda şübhəli bilinən iş adamı Hacıbəy Zaqatalskinin və sürücüsü Nəbi Sulxayevin həbs edilməsi barədə məlumat vermişdik. Xatırladaq ki, adıçəkilən şəxslər rayonda Zaqatala və Balakənin Azərbaycandan ayrılaraq onların bazasında müstəqil respublika qurulmasını təbliğ edən müraciətin və 16 səhifəlik sənədin paylanmasında şübhəli bilinir.
Oktyabrın 13-də, saat 20:00 radələrində Bakının Nərimanov rayonunda soyğunçuluq edən şəxs həbs olunub. Bakı Şəhər Baş Polis İdarəsindən lent.az-a verilən məlumata görə, əvvəllər məhkum olunmuş 1984-cü il təvəllüdlü Sahil Mövsüm oğlu Hüseynov tanışı, II Sülh küçəsində yaşayan 1955-ci il təvəllüdlü Mehdiyeva Esmira Kamil qızının mənzilinə aldatma yolu ilə daxil olaraq ona qolundan bıçaq xəsarəti yetirib. Daha sonra o, E.Mehdiyevanın mobil telefonunu və bir cüt qızıl sırğasını alıb. Nərimanov Rayon Polis İdarəsi 16-cı polis bölməsi əməkdaşlarının keçirdikləri əməliyyat tədbirləri nəticəsində S.Hüseynov tutulub.
Dünyada baş verən maliyyə böhranı Rusiyanın “LUKoil” şirkətinin prezidenti Vahid Ələkbərova 8 milyard dollar ziyan vurub. Dünən bu barədə əksər dünya mətbuatı məlumat yayıb. Məlumatda deyilir ki, V.Ələkbərovun “LUKoil”da payı 20 faizdir, şirkətin səhmlərinin qiyməti isə 58 faiz düşüb. Ancaq V.Ələkbərov səhmlərini satmaq istəmir. O, “Röyter” agentliyinə deyib ki, əksinə, səhmlərin ucuzlaşmağından istifadə edib, yeni səhmlər almaqla şirkətdəki payını artıracaq.
Xəbər verildiyi kimi, Milli Bankın (MB) İdarə Heyəti kreditlərin uçot dərəcəsini 15 faizdən 12 faizə endirib. Faiz dəhlizinin yuxarı həddi 20 faizdən 17 faizə salınıb. Xatırladaq ki, ilin əvvəlində uçot dərəcəsi 13 faiz idi. Sonradan bank rəsmiləri onu 14-ə, daha sonra isə 15 faizə qaldırmışdı. Milli Bankın son addımı müxtəlif aspektlərdən izah olunur. Bildirilir ki, ölkənin kommersiya banklarına xaricdən kredit verilməsinin dayandırılması əsas bankı belə bir addım atmaq məcburiyyətində qoyub. Digər variant kimi inflyasiyanın cilovlanmaz həddə çatması göstərilir.
“Sərhədsiz reportyorlar” mətbuat azadlığını müdafiə təşkilatı hazırda həbsdə olan üç jurnalistin - Mirzə Sakit (Zahidov), Qənimət Zahid və Müşfiq Hüseynovun ailələrinə maliyyə yardımı göstərib.
Prezident seçkiləri ilə bağlı diqqəti cəlb edən neqativ hallardan biri də Mərkəzi Seçki Komissiyasına aid saytın lazımi səviyyədə fəaliyyət göstərməməsi olub. Bu barədə “Seçki 2008" QHT Koalisiyasının yaydığı bülletendə bildirilir. Məlumata görə, dünən saytda xəbər qıtlığı olub, xəbərlər operativ yerləşdirilməyib. MSK-nın məlumatları digər saytlarda yayılsa da, öz saytında bu imkan təmin edilməyib.
Rusiya mətbuatında futbol üzrə milli komandalarda istefası gündəmə gələn baş məşqçilərlə bağlı məqalə dərc edilib. “APA-Sport”un məlumatına görə, vəzifəsini itirmək təhlükəsi qarşısında olanlar arasında Azərbaycan yığmasının baş məşqçisi Berti Foqtsun da adı var.
Azərbaycan milli komandasının baş məşqçisi Berti Foqts Bəhreynlə oyun öncəsi AFFA-nın rəsmi saytına müsahibə verib. Alman mütəxəssis Finlandiya ilə üç gün əvvəl baş tutan oyunun təhlili, yığmada hazırkı vəziyyət, Bəhreynlə bugünkü yoldaşlıq görüşü və bu oyunun vacibliyi haqda danışıb.
Məlum olduğu kimi, hər həftənin birinci günü ANS telekanalında “Toylar kralı” layihəsi efirə çıxır. Bu dəfə müğənni Manaf Ağayev həftə ərzində topladığı 27 min səslə “Faytonçu Nazim”in topladığı 133 SMS-ə qalib gəldi. Verilişin nəticəsində isə o, 29743 SMS topladı.
Bu yay “Şeron”çu Rüstəm Zeynallının məşhur qarmon ifaçısı Aftandil İsrafilovun qızı Həcərlə evlənməsi barədə xəbər yayıldı. Qeyd edək ki, Həcər İsrafilova qrupun direktorudur və onun bu yay İstanbulda Rüstəmlə evləndiyi bildirilir.
